Dag 2 på russetreff

Hei igjen, flotte lesarar. Kjekt at vi faktisk har lesarar kvar einaste dag. Tommel opp! Eg er glad i kvar og ein av dykk. Dersom de har spørsmål er det berre å spørje, forresten. Så har eg sagt det. Dette innlegget er altså om dag nummer 2 i Kragerø. Dag nummer 2 er laurdag.

Gårsdagen var, som ein kan lese om i førre innlegg, ganske bra. Eg vil absolutt seie at dag 1 nådde opp til forventningane eg hadde før eg reiste. Dag 2 derimot… Laurdagen overgjekk alt av forventningar. Dagen starta med frukost. Eg åt 2 skiver med smør og gulost, så simpel er eg. Det fine er at sjølv den simplaste mat er ekstra god på festival og leir.

Etter frukost var det bibeltime. Nok ein gong var eg særs nøgd med innhaldet i talen, samt lovsongen. Det er herleg å bruke tid på Gud på ein slik måte! Etterpå gjekk vi i russeparade ned til Kragerø, som skulle ta omtrent 15-20 minutt om eg ikkje tek heilt feil. Langs vegen stod det ein haug små ungar som sjølvsagt var der for å samle russekort. Stakkarane hadde armane fulle etter kvart, så mange russekort ramla berre på bakken. Dette var eg vitne til, og vi frå vestlandet gjekk heilt framme. Tviler på at dei ungane fekk med seg så mange russekort frå resten av landet.

Her gjer vi oss klare til russeparade.

Vi kom oss i alle fall ned til Kragerø, som er ein utruleg skjønn liten by! Her samla vi oss ved sjøen og det var duka for russeolympiade kor representantar frå dei ulike delane av landet konkurrerte i ulike greiner. Vestlandet vant ikkje, så resultatet er irrelevant. Eg og Andreas gjekk for å kjøpe krone-is og cola. Det var digg i varmen.

Her er Andreas. Vi fant YOLO på boks. Andreas er den mest YOLO personen eg kjenner. HASHSWAG YOLO (Andreas er stolt av dette uttrykket). Følg han gjerne på Twitter, legg han til som ven på Facebook OG send han fine bilete på Snapchat (sikkerhetsaelen).

Det var så varmt at eg måtte gå i berre t-skjorta. Ikkje slik som her heime i kalde og regntunge Randaberg. Etter russeolympiaden var det middag. Vi fekk servert ein gryteredd med kylling og ris, saman med salat og ein bit av ein baguett. Eg åt til eg ikkje var svolten meir, og så gav eg resten til ein som trengte det meir enn meg, fordi han ikkje meinte det var nok med den porsjonen han sjølv hadde fått. Så snill er eg. Etter middagen fekk vi is frå ein snill medruss som gjekk og delte ut vassis frå First Price som smakte overraskande godt. Takk til deg, du er heilt sikkert fast lesar på bloggen vår.

Middag i sola.

Neste post på programmet, seminar, måtte vi vente litt på. Då gjekk vi berre rundt i Kragerø og var så daffe at vi sikkert kunne ha sovna på ein benk om vi ville. Herleg å kunne slappe av og gjere ingenting i sola. Vi deltok på to seminar, eitt om korleis diverse hendingar i livet til den eine av konferansierane hadde forma ho som menneske, og eitt om kristne og alkohol av Morten Eikli. Fantastisk type med gode og klare synspunkt på litt av kvart.

Så bar det opp til Kragerøhallen, altså der det meste skjer i helga. Her var det først litt kveldsmat. Denne gongen åt eg ei skive med makrell i tomat, og to med gulost. Eg får i meg meir mat enn elles når eg er på leir og festival og slikt. Skal ikkje seie meir om dette måltidet, fordi etterpå var det endeleg tid for konsert med LZ7 som er ekstremt gode på å lage partystemning. Det er heilt sant at edru, kristne russ kan feste skikkelig! Skal innrømme at eg var litt sliten, så eg sto litt i bakgrunnen, men det var ingen tvil om at dei som verkeleg dansa og digga musikken storkoste seg! Etter denne konserten var det eit lite mellomrom før ein fantastisk lovsongkonsert, kombinert med nattverdgudsteneste. Det var herleg, rett og slett.

Sjølvsagt har det vore mykje sosialt og slikt òg, men eg skal ikkje skrive samtalereferat her på bloggen. SÅ rar er eg faktisk ikkje, og innlegget er langt nok allereie. Litt trist at eg ikkje har fleire bilete frå dagen, men på Facebook ligg det bilete frå heile helga som alle kan gå inn og sjå på.

Mellom konsertane åt eg forresten eit pizzastykke. Eg er glad i mat når eg deltek på slike arrangement.

Koala out.